Assam buaina vangin nitin mamawhah Thlaphânna tur a awm lo - FCSCA Secretary

Food, Civil Supplies & Consumer Affairs (FCSCA) secretary HL Rochungnunga chuan, Citizenship Amendment Act (CAA) dodalnaa Assam-a buaina chhuak vangin mipui ni tin mamawh - eirawngbawlna gas, petrol, diesel leh buhfaiah tun dinhmunah chuan thlaphànna tur a awm loh thu a sawi.

Vanglaini palai zawhna chhangin HL Rochungnunga chuan, petrol phur rêlin Thawhṭanni khan Ramnagar a thlen thu sawiin, "Tukinah pawh a pangngai ang thoin Aizawlah petrol a rawn thleng. Petrol pump a tam ve tawh a, thingtlang lam pump-ah pawh a tam. Mipui an chî-âi avangin an la vak vak a ni. Mipuiin dah khawl lo se chuan a awm sa ringawt pawh rei tak kan tla ang," a ti.

FCSCA Secretary chuan, an department chuan mipui chiâiin petrol an lâk khawl vak vak avangin lâk theih chin an bituk pawh tunah chuan sût leh a nih tawh thu a sawi. HL Rochungnunga chuan, Supply kudamah buhfai quintal 58,000 leh FCI kudamah qtl. 2,70,000 a awm mek thu sawiin, "December thlaa sem tur kan pe chhuak tawh. Thlak khatah Mizoram pumah qtl. 1,05,000 vel mamawh a ni a, rawn thlen belh lo pawh ni se, kan buhfai neih sa hian nakkum March thla laihâwl vel thleng chu min daih dawn a ni," a ti.

Eirawngbawlna gas-ah pawh tun dinhmunah harsatna a awm loh thu sawiin FCSCA Secretary chuan, "Thingtlang lamah pawh gas a hnianghnâr pangngaiin kan hria," a ti a; chhungkaw pakhatin la khawl vak zel lo se chuan tun aiin gas lak tur a tam tur thu a sawi. HL Rochungnunga chuan, Assam-a buaina awm mah se, tun dinhmunah chuan ni tin mamawha harsatna a awm lo tih sawiin, "Hriat lâwk loh harsatna eng emaw a thleng thut a nih loh chuan buaina tur a awm lo," a ti.