Mumbai-ah Chapchàr Kût hmang

March 19, Ningani khan Mumbai Mizo Association (MMA) bultumin Mumbai khawpuia Mizo chengte'n Chapchar Kut an hmang a, Lunglei HPC vice chairman V Malsawmtluanga, MLA chu Kut Pa a ni.

V Malsawmtluanga chuan, Mumbai khawpuia Mizote chu tlawmngaihna vawng nung tlat tur leh Zo nun ze mawi hnam dang karah pawh lan chhuahtir zel turin fuih a, "Ruihhlo lakah fihlim hram hram ang che u. Mmahni hna thawhna hrang hranga rinawm takin thawk ula, zirlaite pawh ṭhahnemngai tak leh hlawhtling ngei ngei turin zir tum rawh," a ti.

Mumbai-a Chapchar Kut hmannaah hian MMA president leh Mizoram House DRC ni bawk H Lalruatliana pawhin thu a sawi a, Mizo Students & Youth of Mumbai hnam lam chi hrang hrang an entir. Mumbai Mizo mi 700 chuang an kal khawm a, zanriah an kilho nghal a ni.