Draft electoral roll-ah voter 7,88,747 an awm

Electoral roll ennawnna, Special Summary Revision of Electoral Rolls, 2020 atana hman tur draft electoral roll chu December 16, Thawhṭanni khan district tinah tihchhuah a ni. Draft roll-a a lan danin, Mizoram pumah voter 7,88,747 an awm.

Draft electoral roll tihchhuah tâk hi mahni bialtu booth level officer (BLO) hnenah en theih a ni a, DC, SDO (Civil) leh BDO pisaahte en theih a nih bakah, CEO website ceo.mizoram.gov.in ah en theih a ni. Kum 2020 atana electoral roll ennawn turah hian January 1, 2020-a kum 18 tlingte electoral roll-ah thun theih a ni a, kum 18 tling turte chuan an awmna khua/venga booth level officer (BLO), BDO office, SDO (Civil) office leh DC office-ahte dilna an thehlut thei a; online-in nvsp.in ah leh leh mobile application Voter Helpline hmangin an thehlut thei bawk ang.

Electoral roll ennawnah hian December 16 aṭanga nakkum January 15 thleng inthun, paih, insawn leh siam­ṭhat dilna thehluh theih a ni a, dilna chinfel nan January 27, 2020 thleng hun hawn niin, nakkum February thlaah electo­ral roll thar chu tih­chhuah tum a ni. Draft electoral roll-a a lan danin, Mizoram pum­ah vote nei mi 7,88,747 an awm a, chu'ng zinga 3,81,897 chu mipa niin, hmeichhia 4,02,000 an ni a, service voter 4,850 an awm. State pumah polling station 1,222 a awm a ni.