MPCC-in dâwt sawiah CM an puh
Mizoram Pradesh Congress Committee (MPCC) chuan thuchhuah siamin, Mizoram Lok Sabha MP C Lalrosanga'n Citizenship Amendment Bill, 2019 (CAB) a thlâwp chhan chu a chiang ta tih an tarlang a; Mizoram Synod-in CAB an duh lohnaah Mizoram a huam leh huam loh an sawi lo tih sawiin, CAB chungchangah hian chief minister Zoramthanga chu dâwt sawiah an puh.
MPCC chuan, December 16, 2019-a Hnam Rûn khârnaah CM Zoramthanga’n, 'Zirlai pawl, kohhran, NGO leh party-te'n kan rawtna ang takin kan ti ta e, an tih tâk si avangin, mahni rawtna do zawnga vote leh si kha a puitlin loh thlak kan ti a. Kan MP pawh party-in kan rawtna leh ngenna ang chiaha an pawm avangin vote turin kan hrilh a ni,' tia a sawi chu mak an tih thu an sawi a, "Mipui hmaa dâwt chiang tak a sawi hi mipui zah lohna dik takah kan ngai," an ti.
CAB 2016 a nih lai aṭangin CAB chu India rama sakhaw zalenna leh sakhaw intluktlanna dan palzûtna a nih avangin Congress party chuan an dodal tawh tih sawiin MPCC chuan, "CAB hi kaltlangpui ni suh se tih chu kan auhla a ni reng ṭhin," an ti a; Mizoram chauh huam lo turin thu an la nei ngai lo tih an sawi.
Congress party chuan, Mizoram Presbyterian Kohhran pawhin India rama CAB hman a nih loh nan Synod Inkhawmpuiah hmalak an rél tih sawiin, "Kohhran tinah ṭawngṭai rualna an neih bakah, Prime Minister leh state hrang hrang Governor-te hnenah lehkha pek ni se, an ti a. Mizoram chauh huam tel lo tur hian kohhranin ngaihdan a la siam lo. Chuvangin, CM Pu Zoramthanga thusawi hi an thil tih sual thup mawi tumna dâwt chiang tak a ni," an ti.
MNF party thu anga CAB thláwp zawngin Lok Sabha MP C Lalrosanga’n vote a thlak tih CM leh MNF president Zoramthanga’n a puang ta chu lawmawm an tih thu sawiin MPCC chuan, "Kan MP pawh party-in kan rawtna leh ngenna ang chiaha an pawm avangin vote turin kan hrilh a ni, tih a sawi hian CAB thláwp zawnga MP-in vote a thlak chhan a tichiang ta a ni," an ti a; MNF party rintlak lohzia leh mipui bumtu an nih dan a chiang ta hle niin an sawi.
Congress party chuan, "CAB/CAA dodaltu apiang MNF do zawnga che anga an ngai tlat leh mipui leh kohhran mite rilru tina zawnga tun thlenga an che lui reng hi hriatthiam har kan ti tak zet a ni," an ti bawk.