Rél chawlhhmun panna zauhna atan zangnadawmna tel loin ram pe phal

March 20, Zirtawpni khan Aizawl bawrhsap Lalhriatpuia kaihhruaiin DC conference hall-ah Sairang rel chawlhhmun panna kawng laih zau tur chungchang sawiho a ni a; ram neitu C Lalṭanpuia, Mosia Agency chuan zangnadawmna beisei loa a ram laih a phal thu a sawi.

Ṭhutkhawmah hian C Lalṭanpuia chuan, a ram chu sorkarin a mamawh a nih phawt chuan a ui loh mai bakah, kawng kal tana ṭha zawk tur a nih chuan tuna ruahmanna awm sa mai bakah, a aia tam pawh a ṭul anga pek/laih a ui loh thu a sawi. Chutihrualin, a ram hungna pal, gate, chowkidar chenna in leh choka tihchhiat a ngaih dawn avangin a sak ṭhatna tur tlem azawng tumsak theih an nih chuan a ram tihchhiat man emaw, zangna dawmna a phût lo tih a sawi bawk.

Sum leh pai beisei neih loin vawi tam tak a ram chhungah khawtlang leh sorkar tan kawng a thlawnin a laihtir/pek tawh ṭhin thute hriat a ni a; tuna national highway aṭanga Suaka Cricket Ground panna tur kawng leh tuna Sairang station panna kawngte pawh a thlawna a pek vek a nih thu tarlan a ni.

Aizawl Bawrhsap chuan, C Lalṭanpuia ram leh mipui tana a inpekna leh thil phalna leh a inpeknate chu ropui a tih thu a sawi.