KHAWTHLIR

Lalramthanga To­chhawng, IAAS chu Additional Deputy Comptroller and Auditor General grade-ah a kaisang a, hei vang hian New Capital Complex-a Principal Accountant General Office chu December 16, 2019 aṭang khan Additional Deputy Comptroller and Auditor General office dinhmun­ah hlânkai a ni.

Maraland Gospel Centenary Hospital, Siaha leh Champhaia DM Hospital-te chuan tun hnai khan Mizoram State Health Care Scheme an zawm thar.

Excise & Narcotics department leh Police-te chuan November 2019 chhung khan zu zuar mi 129 leh zu rûi mi 11 an man a, rakzu litre 11,069.85 an man bawk. November thla chhung vêk khan zu bilh lai ṭín 21,810, zu siamna dawidim kg. 159.5, sap zu ml. 750 ûm 4,247, ml. 375 ûm 7,590, ml. 180 ûm 12,000 ram dang zu ûm 27, beer ûm 3,918 leh can 7,465, apple juice litre 209.4 an man a; zu sakna bél 74 leh zu kaihhnawihah lirthei 13 an man bawk.

Tourism department chuan vawiin hian Lammualah Winter Festival an huaihawt dawn. Winter Festival hi chawhma dar 11-ah ṭan a ni dawn a, deputy chief minister Tawnluia chu khuallian tur niin, Tourism minister Robert Romawia Royte chu khualzahawm a ni ang. Festival-ah hian intihhlimna chi hrang hrang a awm dawn a ni.