Kuminah ruihhlo vangin mi 19 thi tawh

Excise & Narcotics department (END) chhinchhiah danin, kumin 2026-ah January aṭanga March 18 thlengin Mizoramah ruihhlo vangin mi 19 an thi.

Ruihhlo vanga thite chu kum 19 - 42 inkar an ni a, an zinga mi 5 chu heroin ti ṭhin niin, a bak zawng chu heroin leh ruihhlo dang khawih pawlh an ni. Ruihhlo vanga thite chu mipa 17 leh hmeichhia pahnih an ni.

Kum 1984 aṭangin END-in Mizorama ruihhlo vanga thi zat an chhinchhiah ṭan a; kum 1984 aṭanga March 18, 2026 thlenga ruihhlo vanga thi an chhinchhiah chu mi 2,016 an ni a, mipa 1,770 leh hmeichhia 246 an ni.

Mizorama ruihhlo vanga thi mi 2,016 chhinchhiahah proxyvon ti ṭhin mi 1,161, heroin ti ṭhin mi 312 leh ruihhlo chi khat aia tam tih pawlh ṭhin mi 543 an ni. Kum 2017 aṭangin heroin vanga thi an pung nasa a, proxyvon vanga thi an awm tawh lo thung.