KHAWTHLIR

Thisen pe

March 21, Inrinni khan kohhran ṭhalai pawl pathumin thisen unit 000 an pe. Salvation Army Youth Central South Division-in ZMCH tan unit 52 pein, petute mipa 37 leh hmeichhia 15 an ni a; KṬP, Mission Vengthlang Branch-in Synod Hospital tan unit 51 pein, petute mipa 43 leh hmeichhia pariat an ni. Adventist Youth Federation, Lunglei South-te'n Lunglei Civil Hospital tan unit 24 an pe a, petute mipa 17 leh hmeichhia pasarih an ni.

World Forestry Day

March 21, Inrinni khan Jawaharlal Navodaya Vidhyalaya, Thenzawlah Thenzawl Forest Division-a thawkte leh JNV-a zirlaite leh zirtirtute'n 'World Forestry Day' an hmang a, Thenzawl DFO Dr R Lalnungrenga'n a hmanpui. Thenzawl range officer Zirtluanga Hnamte-in Forestry Day thupui 'Forests and economics' tih a sawi a, JNV principal Anish P-in environment humhalh pawimawhna a sawi bawk.

MFM free clinic

Mission Foundation Movement chuan March 21, Inrinni khan Rulchawm khuaah Ministry of Tribal Affairs funding kaltlangin a thlawna inentirna an buatsaih. Clinic-ah hian Dr Rualthankhuma Renthlei leh Dr CK Lalfakawmi te an ṭhu a, mi 150 an inentir a, an mamawh ang damdawite a thlawna pek a ni.

Oil pump endik

Siaha DCSO M Vanlal-duata chuan March 20, 2026 khan Siahaa MIZOFED Gas Agency leh petrol pump pahnih - Immanuel Filling Station leh J Rama Filling Station te a tlawh a, a endik. Siaha khawpuiah eirawngbawlna gas leh tuialhthei a awm ṭhat thu tarlan a ni. Gas agency hotute chuan, gas card neitu (holder) mobile number ngei aṭang chauhin gas hi book/miscall theih a nih thu mipuiin hre thar leh se an duh tih an sawi.

Thing phurh man

Kawrthah Forest Division chuan tun hnai khan Rengdil khaw daiah leh Bungṭhuam khuaah dan loa thing phur truck pakhat ve ve an man a, thingte chu Assam lama phurh tur nia hriat a ni. Dan loa thing phur emaw, thil dik lo ti hmute chu Range Office hnai berah hriattir turin an ngen.