Myanmar-ah tuialhthei phurh luh khap a ni

Lunglei district magistrate Navneet Mann chuan thupek chhuahin, Lunglei district aṭangin Myanmar ram chhungah tuialhthei phurh luh khap a nih thu a puang.

Bawrhsap chuan, tunlaiin Lunglei district chhungah phalna nei lote'n Myanmar leh ram danga hralh tur tuialhthei (petrol leh diesel) an phur chhuak ṭhin nia report an dawn thu a tarlang a, "Tuialhthei phurh chhuah phalna/storage licence nei loa tuialhthei phurh chhuah hi The Petroleum Rules, 2002 Rule 3 chuan a khap a, dan zawm lote chu dan hmang vêkin na taka hrem theih an ni. Lunglei district huam chhunga tuialhthei zuartute'n mipui hnenah hnianghnar taka tuialhthei an pek theih nan Myanmar-a hralh tur tuialhthei phurh chhuah hi khap tlat a ni, " a ti.

Thupek zawm lote chu The Petroleum Act, 1934 Section 23 leh Bharatiya Nagarik Suraksha Sanhita (BNSS), 2023 Section 163 tlawh chhanin an chungah hremna lek kawh theih a nih thu a tarlang bawk.