Online hmanga ILP pekna tur Home minister Chama'n a hawng

Home department leh Information & Communication Technology (ICT) department hmalaknaa siam, Inner Line Permit (ILP) Portal chu nimin khan Police Headquarters-a Arya Mess-ah Home minister Lalchamliana'n a hawng. Portal hawn thar tâk hmang chauhin ILP (temporary leh regular) pek chhuah tawh tur a ni.

Lalchamliana chuan, ILP Portal chu Mizoram mipui himna atana sorkarin a duan a nih thu sawiin, "Mizoram tan ni chhinchhiahtlak a ni. ILP chung­changah sponsor-tu te, ILP hmangtu te, a endiktute leh a buaipuitute pawhin a nihna ang leh dan anga tih loh a awm ṭhin avangin harsatna kan tâwk ṭhin. Online kaltlang erawh hi chuan sponsor-tuin a sponsor-a kha a chhawrna turah a chhawr ngei em, a chhawr zawhah khawiah nge a thang tihte a hriat theih tawh dawn avangin, sponsor-tute pawh an fimkhur a ngai tawh dawn a ni," a ti.

Sorkar thuchhuah tarlan dan­in, ILP Portal-ah ILP sponsor-tute nihna (bio-data) kimchang zawka pek a ngai tawh dawn a, sponsor-tu reng rengin EPIC number hmang chauhin hnam dang an sponsor thei tawh dawn. Sponsor theih zat pawh system-in a vèn tawh dawn avangin sponsor-tute'n an mi chhawr (sponsor)-te ngaihven zui leh an haw leh ngei em tihte thlengin an ngaihven a ṭul tawh dawn a ni.

Mizorama hnam dang lo lut tur ILP ngai chi reng rengte'n ILP an lâk a, a awm hun a tàwpa an haw leh dawnah pawh checkgate-ah inhriattir zel a ngai tawh dawn a, Mizoram an chhuahsan ngei tih chhin­chhiahna kawngah a pawimawh dawn a ni. ILP pass holder, dan loa Mizorama awm chhunzawm rengte chu anmahni leh sponsor-tute thlengin an chungah action lak theih a ni dawn.

Tun hmain ILP lem hmangin Mizoramah hnam dang an lut ṭhina hriat a ni a, chu chu sorkarin a ngaimawh hle a ni. ILP Portal thar hmang hian a endikna tur mobile application 'ILP Mizoram' siam a ni a, he mobile app hi hmang 

ṭangkai turin Home department chuan mipui an sáwm a ni.

ILP pek thar reng rengah chuan ILP neitu nihna kimchang tak ziahna A4 size leh ID card pek tel a ni tawh dawn a, chu'ngah chuan quick response code (QR code) dah tel a ni. QR code chu 'ILP Mizoram' app hmanga scan-in ILP lem leh tak hriat theih a ni a, QR code scan nan mobile apps dang hmang lo turin Home department chuan mipui an chah a ni.