Mipui zah lo-ah MPC-in Zorama an puh

MPC party chuan nimin khan thuchhuah siamin, December 16, 2019-a Mizo Hnam Rûn khârnaah chief minister Zoramthanga’n, political party, NGO, zirlai pawl leh kohhrante rawtna leh duh dan angin Citizenship Amendment Bill (CAB) pass a ni anga a sawi chu Mizo mipui zah lohna leh thamlohna lian takah an ngai a, an dem thu an tarlang.

'CAB-ah Mizoram telh suh u,' tih vangin Mizorama party leh pawl dangte'n CAB an thlàwp thu an auchhuahpui lo tih sawiin MPC chuan, "Kan duh lohna leh dodalna naménloin kan lantir châmchí zawk a ni tih hai der lui tlat chief minister Mizoramin kan hrawn hi a vanduaithlak kan ti tak meuh a ni," an ti.

CAB chu Mizoram tan mai ni lo, India ram pum tan pawh a him lo a, India danpui kalh, sakhaw inthlei theihna keng a nih avangin a tìr aṭangin MPC-in an do a, Central-ah memorandum an theh­lut tih sawiin, "Kan duh lohna leh dodalna nasa takin kan lantir a, PRISM party nen memorandum inṭâwm siamin Central-ah kan thehlut bawk," an ti a; Home minister Amit Shah-a'n Mizoram a rawn tlawh ṭum pawhin CAB an duh lohna an lo lantir thu an sawi.

MPC party chuan MNF President chu dâwt­a political party, NGO, zirlai pawl leh kohhrante puhah puh lêtin, "MPC chuan CM Pu Zoram­thanga hi a rang thei ang bera thupha chawia ngaihdam dil ngei turin kan phût a ni," an ti a; kohhran leh Mizo mipuiin nasa taka CAB/CAA an dodal laia insawi fihlim nan leh hmai phih nana dik lo taka political party, NGO, zirlai pawl leh kohhrante hmang tawh lo turin MNF President chu an chah bawk.