Mizo puan humhalh dan buaipuitu Technical Sub-Committee din belh

Art & Culture department chuan sorkar laipuia Department for Promotion of Industry and Internal Trade (DPIIT)-in Mizo puan pangate Mizo ta a ni tih chhinchhiahna, geographical indication (GI) tag/registration a pekte enkawla humhalh­tu tur 'Committee on Inspection Structure for Geographical Indication of Traditional Mizo Puan' a din tawh a; benchmark siam zûlzuia harsatna awm theite chîk zawka chhui chiangtu tur 'Technical Sub Committee on Inspection Structure for Geographical Indication of Traditional Mizo Puan' an din belh.

Sub-Committee hian kumin August 16 & 22, 2019-a GI tag pek tawh Mizo puan panga - Puanchei, Tawlh­lohpuan, Pawndum, Ngotekherh leh Hmàrám-te tah chhunzawm zel dan tur leh harsatna thleng theite an chhui/bawhzui dawn a; an thil chhui chhuahte chu Art & Culture Secretary hnenah an thehlut ang a, an thehluh milin Mizo IG tag-te humhalh dan tur mumal zawk siam tum a ni. 

Technical Sub-Committee-ah hian Art & Culture department Joint Director chu chairman a ni a; member-te chu - Boichhing­puii (Chaltlang), Lalhlimpuii (Zarkawt), MISTIC scientific officer Samuel Lalmalsawma, MISTIC patent officer C Lalthanzuala leh Art & Culture-a technical assistant Vanlalhuma Singson te an ni.