Krismas leh kumthar vuakveta Aizawl khawpui himna tur sawiho
Krismas leh kumthar thleng turah dan leh thupek kenkawh chungchang sawihoin nimin khan Aizawl DC Vanlalngaihsaka hoin a pisaah thuneitute an ṭhukhawm a; Aizawl SP, Traffic SP, DC pisapuia officer-te leh Central YMA aiawhte an tel.
Aizawl Bawrhsap chuan, Cr.PC 1973 Section 144 tlawhchhanin Krismas leh kumthar vuakvêtah hâlpuah, hâlmawi, silai lem a mû nei chite hralh, lei leh hman khapna thupek tihchhuah a nih tawh thu a sawi. Aizawl SP C Lalzahngoa chuan, police hmalak mek dan leh hmachhawpte sawiin, police help desk siam te, hunpui bik atan temporary check post siam leh mobile patrolling-te chu tih mek leh tih zel a nih tur thu a sawi.
Central YMA hruaitute chuan, YMA sub-headquarters, group leh branch tinah mipui vantlang himna atan a ṭul anga hma la tura hriattirna lehkha an thawn chhuah tawh thu an sawi bawk. Meeting chuan, mipuite'n hlim leh thlamuang taka hunpui an hman theih nan dan zâwm ṭheuh turin mi tin an ngen a; an ngenna chu kohhran tinah ziaka thlen an rél a ni.
Krismas leh kumthar vuakveta venhimna lama hmalaknate endika khawtlang dinhmun hre chiang tura kal kual turin magistrate 11 ruat an ni a, magistrate-te chu veng chan bik pein, an chan vengte hneh taka vil tura tih an ni.