KHAWTHLIR

MJA Day lawm

MJA, Lawngtlai District chuan nimin khan Lawngtlai Press Club-ah Mizoram Journalists' Association (MJA) din champha vawi 54-na an lawm a; LADC chief executive member C Lalsawmzuala khuallian niin, LADC executive member i/c IPR Lalropuia Chinzah khualzahawm a ni. Inkhawm hi Lawngtlai MJA vice president H Lalrinmawia'n a kaihruai a; khuallian leh khualzahawm bakah, Lawngtlai MJA president Elvis Lalthangzuala ten thu an sawi. MJA hi March 23, 1972 khan din a ni.

Thisen pe

Penticostal Youth Department (North East India), Siaha District Bial chuan March 21, 2026 khan thisen pek an huaihawt a; Lawngtlai District Hospital tan thisen unit 30 an pe a, petute mipa 22 leh hmeichhia pariat an ni.

Ruihhlo ṭhat lohzia inzirtir

Foundation for Drug-Free Mizoram chuan nimin khan West Phaileng Dinthar Presbyterian English School-ah ruihhlo ṭhat lohzia inzirtirna an buatsaih a, bialtu MLA Dr R Lalthangliana'n a hmanpui. Resource person Albert Lalremsanga'n ruihhlo hlauhawmzia leh ruihhlo laka fihlim dan tur zirlaite a hrilh a ni.

DDK-in ngaimawh

Doordarshan Kendra, Aizawl chuan thuchhuah siamin, DD Mizoram Indigenous Games & Cultural Festival 2026 zawh tâk chu DDK, Aizawl phalna leh hriatpuina tel loin youtuber ṭhenkhatin social media-ah an dah tih hriat a nih thu leh an ngaih thutak thu an tarlang a; "DD Mizoram logo paih bo a, anmahni logo dahte pawh an awm tih hriat a ni. Hei hi copyright infringement leh Copyright Act kalh, dan bawhchhiatna dik tak a ni a, dan anga hremna theih a ni," an ti.

Outreach programme

Central Bureau of Communication, Field Office, Aizawl chuan nimin khan Sesawnga Central Training Institute-ah Viksit Bharat@2047 chungchang inzirtirna, Special Outreach Programme an buatsaih. Inzirtirna hi CBC, Aizawl FPA Lalginlen Lhouvum-in a kaihruai a; resource person Angeline C Lalrinawmi'n zirna, economy leh inrelbawlna kawnga India ram hmasawnna hrang hrang a sawifiah.