Hnahthialah END Annual Inspection nei

Nimin khan Hnahthial District Assistant Commissioner Office-a thawktute tan Annual Inspection neih a ni a, Excise & Narcotics commissioner Z Lalhmangaiha'n hmanpuiin, transfer & posting chungchangah an awmna hmun ṭheuhah puitling taka awm zel turin thawktute a fuih.

Z Lalhmangaiha chuan, Hnahthial district tiamin district thar pathuma END pisate chu sorkar duhsakna zarah assistant commissioner awpin an lo awm vek tawh thu a sawi a, "Transfer & posting chungchangah uluk takin department ṭhat nan mai bakah, transfer turte chhungkaw dinhmun en chunga siam ṭhin a ni a, kan awmna hmun hrehawm deuh pawh ni se, puitling takin tuar ang u," a ti.

END chu quantity-ah tam lo mah se, quality ngai pawimawh turin Commissioner chuan thawktute chahin, "Mahni hna ṭheuh hlim tak leh zah taka thawk chungin, lungawi tak leh chapo loin i thawk tlâng ang u," a ti a; Hnahthiala END pisa chuan mahnia inrêlbâwlna hran a neih theih nan financial year tharah LOC charge an neih hman ngei a beisei thu a sawi bawk.

Hnahthial END pisaah hian assistant commissioner Malsawmdawngzela hoin thawktu - officer in-charge pakhat, sub-inspector pakhat, head constable pakhat, constable panga leh 4th grade pakhat an awm mek a, constable pakhat dangin a zawm belh thuai beisei a ni. Nimina Annual Inspection-ah hian mamawh leh duh zawng sawina hun hman a ni.