Myanmar lama tuialhthei hralh khap

Siaha district magistrate VL Hruaizela Khiangte chuan thupek chhuahin, sumdawnna kaihhnawih thilah Myanmar leh ram danga dan loa tuialhthei (petrol & diesel) hralh emaw, pek chhuah emaw khap a nih thu a puang a, "Thupek bawhchhiate chu BNS 2023 Section 223 hmanga na taka hrem an ni ang," a ti.

District Magistrate chuan, tunlaiin Siaha district-a mi ṭhenkhatte'n Myanmar lama hralh chhàwn turin Siaha district-a filling station ṭhenkhatah petrol leh diesel a hlawmin an la ṭhin tih hriat a nih thu a tarlang a, "Hei hian mipui tan harsatna lian tak thlenin, kan district chhungah tuialhthei indaih lohna a awm phah ṭhin," a ti.

Bawrhsap chuan, "Siaha district chhunga filling station-te'n sorkarin a man a bithliah aia sang (black market)-in tuialhthei an hralh tur a ni lo. Filling station zawng zawngte'n petrol litre 500 leh diesel litre 1,000 chin chunglam chu phalna neia dahṭhatna neite hnenah chauh an hralh tur a ni," a ti a; sumdawnna kaihhnawihah Myanmar leh ram dangah dan loa tuialhthei hralh/pek chhuah khap tlat a nih thu a tarlang a ni.