Assembly hnuaia Subject Committee-I in Mamit-Phaizau kawng sial mek an endik

Mizoram Legislative Assembly-a Subject Committee-I member-te chuan nimin khan PMGSY hnuaia Mamit-Phaizau kawng, km. 10.480-a thui sial mek tlawhin an enfiah. 

Subject Committee-I hi chairman H Lalzirliana hoin an thawk chhuak a; member dang kalte chu - Vanlalhlana, Lawmawma Tochhawng, VL Zaithanzama leh C Lalsawivunga te an ni. Mamit-Phaizau kawng sial mek hi PMGSY Phase-IX hnuaiah October 27, 2017-ah thawh ṭan a ni a, sum ruahman chu cheng nuai 1033.14 a ni. Kawng laih hna, culvert siam leh retaining wall siam hna chu hlawm ngaah ṭhen niin, contractor pangate'n an thawk mek a; kawng sial leh a kaihhnawihte chu April 2020-ah zawh tura tih a ni.

Subject Committee-I member-te chu Phaizau khawtlang hruaitute nen kawng sial mek chungchangah an inkâwm a; Phaizau khawtlang hruaitute chuan, an khaw kawng sial hna chu chak zawk leh a zawh hun tura bitukah zo hman ngei tura an duh thu sawiin, kawngpui ṭha tak an neih ngei theih nan hma lakpui turin an lo ngen.