Mizorama ram kâng zat a tlahniam NE-ah Mizoramin ramngaw a nei zau ber

Forest Survey of India (FSI) chhinchhiah danin, kum 2015 aṭangin kum tin Mizoramah ram kâng a tlem tial tial. ISFR-2019 report-a a lan danin, December 2017 aṭanga February 2018 chhunga satellite data hmanga zir chiannaah, Mizoram puma ram hring (forest cover) zat chu Mizoram zau zawng aṭangin 85.41% a ni a; state zau zawng aṭanga tehin hmarchhak state zingah Mizoramah forest cover a zau ber.

FSI hian kum 2015 aṭangin satellite hmangin kângmei chhuak a awm leh awm loh an vil ṭan a, inrálrinna (fire alert) an thawn chhuak ṭhin. An report-a a lan danin, kum 2015 aṭanga kum 2019 chhunga Mizorama kângmei chhuak chhinchhiah zat chu 13,913 a ni a, chu'ngte chu lo hâl 13,132 leh huan/lo ni lo hmun dang kâng 480 a ni.

FSI-in kum 2015-a Mizorama kângmei chhuak a chhinchhiah zat chu 2,469 niin, chu'ng zinga 2,351 chu lo hâl a ni a, hmun danga kângmei chhuak 118 a awm. Mizorama kângmei chhuak zat a tlahniam ve tial tial a; kum 2018-ah chuan FSI-in kângmei chhuak hmun 2,096-a mi a chhinchhiah a, chu'ng zinga 1,860 lo/huan hâl niin, lo leh huan ni lo hmun/ram dang 20-ah kângmei a chhuak.

Kum 2019-ah chuan kângmei chhuak 1,452 a awm a, chu'ng zinga 1,357 chu lo/huan hâl niin, kângmei chhuak pangngai chu 12 chiah a ni.

India State of Forest Report (ISFR-2019) report-a a lan danin, December 2017 aṭanga February 2018 chhunga satellite data hmanga zir chiannaah, Mizoram puma ram hring (forest cover) zat chu 85.41% a ni a; Mizorama district zingah Champhai district chu forest cover tlemna ber niin, forest cover chu 78.09% a ni.

Mizoram pumah kum 2017-a forest cover zat chu state pum zau zawng (geographical area) sq.km. 21,081 aṭangin 86.26% a nih laiin, kum 2019-ah chuan sq.km. 18,006 (85.41%) a ni a, 0.85%-in a tlahniam.

December 2017 aṭanga February 2018 inkarah Mizorama forest cover zau zawng chu sq.km. 180.49-in a tlahniam a, chu'ng zinga a tam zawk sq.km. 115.21 (63.83%) chu Champhai district chhunga thleng a ni.

India ram hmarchhak state zingah state pum zau zawngaṭanga tehin Mizoram chu forest cover zauna ber (85.41%) a ni a, a hnaih bertu Arunachal Pradesh-ah 79.63% a ni. NE state-a forest cover tlemna ber state Sikkim-ah 47.10% chiah a ni thung.

Mizoram bikah, ramngaw dur (very dense forest) sq.km. 157 a awm a, ramngaw pangngai sq.km. 5,801 awmin, ramngaw tling pha lo, thing leh mauin a khuh ve si sq.km. 12,048 a awm. Chutih laiin, hnim (scrub) ang chiin a luah sq.km. 1 a awm bawk.