Mizorama khualzin dawnsawn dan turah Tourism dept leh Synod hotute inkâwm

Nimin khan Tourism minister Lalnghinglova Hmar hoin a pisaah Tourism department hotute leh Mizoram Synod aiawhte an inkâwm a, Mizorama khualzin rawn lutte dawnsawn kawnga thawhho dan tur an sawiho.

Tourism Minister chuan, Mizoram tlawhtu pung zel chu a lawmawm hle rualin, fimkhur taka lo dawnsawn a ṭul tih a sawi a, "Mizoramah kum 2025 chhungin khualzin mi nuai 8 chuang an awm a, kuminah a aia tam an awm kan ring. Khualzinte hi lo kal belh zel se kan duh a, chutihrualin, mi chi hrang hrang lo lut hian thil ṭha lo ken tel a nei thei a, chu'ng laka lo inven lâwk leh dawnsawn dan turah nasa taka zirtirna kalpui a ngai," a ti.

Mizoram páwn aṭanga khualzin rawn kal zinga a tam ber chu ringlo mi an nih thu sawiin Minister chuan, "Biak-in chhung leh a chhehvela awm dan mawite pawh inzirtir a ngai," a ti a; kohhran hruaitute tan pawh ringlote hnena rawngbawlna hun ṭha a inhawn theih thu a sawi.

Mizoram Synod aiawhte pawhin thu sawiin, tourism-a hmalakna langsar tak awm mek chu lawmawm an tih thu an sawi a, "Hnam dang min tlawhtute’n nuam ti tak si, kan chenhona leh khawtlang nun zah tak sia hun an hman theih nan sorkarin ruahmanna mumal tak a neih a pawimawh," an ti.

Mizoram mawina leh khawtlang nuam tak, hmeichhiate tana him, traffic dan zawm ṭhat, leh thil dangte chu Kristianna vanga Mizoramin a neih a ni tih tarlan pawimawh an tih thu an sawi bawk.

Mizoram tourism-in hma a sawn theih nan kohhran a inhawng a, an ṭangkai theihna leh sorkarin a mamawhna zâwnah thawhho an duh tih Mizoram Synod aiawhte chuan an sawi a; sorkarin kohhran hmalakna tura a beiseite chu inthlahrung hauh loa hrilh ṭhin turin Tourism department hotute an chah.

Inkawmnaah hian thlasik boruak nuam leh Krismas vuakvêt, khualzin tam zual lai chu a hlimhlawp lam bakah, Chanchin Ṭha hrilhna remchanga hman theih ṭha an ti a; Mizoram sorkarin culture, adventure leh nature lam hawiin tourism a kalpui mek thu te, a bik takin cultural tourism-ah Mizo hnam nunphung leh Kristianna langsar zawka tarlang tura thawhho theih dante sawiho a ni.

Khualzinte'n awlsam taka an chhiar theih turin Mizoram an chàm chhunga hriat tur pawimawh hrang hrangte ziak a thehdarh ṭha tih a ni bawk.

Tourism Minister ho hian Council of Churches in Mizoram leh Tourism department aiawhte chu January 20, 2026 khan Mizoram tourism chungchang sawihoin an inkâwm tawh a; kohhran dangte leh tlawmngai pawl dangte nen pawh inràwnkhawmna neih zel tum a ni.

Nimina inkawmnaah hian Tourism department aṭangin secretary Vanlaldina Fanai, additional secretary Irene Zohlimpuii Chawngthu leh director R Lalrodingi an tel a; Mizoram Synod aṭangin executive secre-tary Rev Dr K Lallawmzuala, Synod Social Front aṭangin Rev. Lalrinmawia, Lalchhung-liana leh Upa Lallianmawia te an tel a ni.