Vangchhia-in haw rûnpui an hmang

Vangchhia khua chuan nimin khan an khaw community hall-ah 'Vangchhia Haw Rûnpui' an hman a, bialtu (East Tuipui) MLA Ramthanmawia'n hmanpuiin, khualzin tam zawk dawngsawng thei tura inbuatsaih a ṭul thu leh pipu sûlhnate ṭha taka humhalh zel a pawimawh thu a sawi.

Ramthanmawia chuan, Vangchhia chu Mizoram khuate zinga khaw hlun leh pawimawh a nih thu a sawi a, "Mizo history sawia sawi tel ziah ngai, pipute sûlhnu hlu tak takte leh Kawtchhuah Ropui awmna, Mizoram khuate zinga khualzinte tlawh châk ber pawl a ni a, khualzin tam zawk dawngsawng thei turin inbuatsaih a ṭul a, pi leh pute sûlhna ṭha taka humhalh zel a pawimawh," a ti.

East Tuipui bialtu MLA chuan, khawtlang hmasawnna atan zirnaah ṭan lak a ṭul thu te, ramngaw leh tuihna humhalh a ṭul thu te, khawtlang ṭangruala ruihhlo do a ṭul thu te, dik taka sum leh pai lak luh a ṭhat thu te a sawi bawk.

Vangchhia hi kum 1885 khan Sailo lal Thawmpuia, F Liansuaka leh Neihchungnunga te unau in an sah a ni a; Hualngo leh Vangchhia hnamte a hlawma an khawsak tawhna niin, kum 141-na a hmang mek. In 170 khuaa chhàl niin, mi 1,000 vel an khawsa mek a ni. Vangchhia Haw Rûnpui hi March vawiin leh naktukah hman chhunzawm a ni ang.