Champhaiah VB-G RAM-G chungchang zirho

Press Information Bureau (PIB), Aizawl chuan nimin khan Champhai Press Club-ah VB-G RAM-G Act, 2025 chungchang zirhona, media workshop VARTA an buatsaih a, Champhai bawrhsap Mohammad Aaquib khuallian a ni.

Media workshop hi PIB Aizawl head of officer Rajeev Lourembam-a'n a kaihruai a; sorkar ṭha a awm theih nan te, sorkar hmalaknate leh VB-G RAM-G chungchang mipui zirtir kawngah thuthar thehdarhtute an pawimawh thu sawiin, media workshop leh thuthar thehdarhtute kaltlangin mipuiin VB-G RAM-G an hriat chian phah ngei a beisei thu a sawi.

Khuallian Mohammad Aaquib chuan, zirhonaa tel thuthar thehdarhtute chu ram leh khawtlangah dinhmun pawimawh tak chelh an ni tih inhria a, chanchin thar dik leh rintlak chauh puangzar zel turin a chah a; VB-G RAM-G Act, 2025 chu MGNREGA thlakna tur a nih thu sawiin, "Kum khata ni 100 inhlawhna siam ṭhin kha ni 125 siam ṭihn a ni tawh dawn a ni," a ti.

Champhai Bawrhsap chuan, Mizoramah HIV/AIDS a hluar thu sawiin, "HIV/AIDS chungchang hi state sorkar, media-te leh thuthar thehdarhtute'n kan ngaih thutak a ṭul a, mipui vantlangah, a bik takin zirlaite zingah inzirtirna nasa lehzuala neih a ṭul," a ti a; HIV/AIDS hlauhawmzia leh kai lo tura inven dante nasa lehzuala puangzar turin chanchinbumite a chah.

Zirhonaah hian Champhai leh Khawzawla thuthar thehdarhtute an tel a; Champhai IPRO Lalzara, Champhai district MJA president Lalhlupuia leh Khawzawl district MJA president Lalrotluanga Ralte ten thu an sawi bakah, zawhna leh chhanna hun hman a ni.