Livestock insurance programme hawn a ni; Vety Minister-in vaimin chi sem tur a vailiam
Animal Husbandry and Veterinary minister C Lalsawivunga chuan nimin khan Champhai District Vety Hospital-ah National Livestock Mission hnuaia Livestock Insurance programme a hawng a; ‘Maize and Soyabean contract farming for Animal Feed Production’ hnuaia vaimim chi sem tur a vailiam bawk.
Vaimim chi vailiam zat hi quintal 38.29 a ni a, project hi kum hnih chhung kalpui tur niin, a tum ber chu - ranchaw atana vaimim mamawh thar a ni. Agriculture department nena hmalakho a ni a, vaimim tharte chu Vety department-in kg khat Rs 28 zelin a thartute kawtkaiah a leisak ṭhin dawn.
Vety department chuan deparment feed plant-ah thla tin vaimim quintal 500 vel an mamawh a; he project aṭang hian quintal 8,200 thar theih beisei a ni.
C Lalsawivunga chuan, vaimim lei nan department-in sum tam tak a sêng ṭhin tih sawiin, "Duhkhawp kan hmuh ṭhin loh avangin state hrang hrang bakah, Myanmar aṭangtea lak luh a ni ṭhin. Vaimim hi department-in a mamawh reng avang leh market awm sa a nih avangin kut hnathawktute kaltlangin kan harsatnate hi sutkian theih a ni," a ti a; project atan Bána Kaih hnuaiah cheng nuai 408 hmuh a nih thu a sawi.
Champhai, Saitual leh Khawzawl district-a khaw 10-ah Maize and Soyabean Contract Farming for Animal Feed Production kalpui tura ruahman a nih thu sawiin Lalsawivunga chuan, "Loneitu chhungkaw 464-in vaimim thar chhuah rûnpui an kalpui dawn. Mizoram hi ranvulh aṭangin kan intodelh thei reng a, intodelh turin mi tinin ṭan kan lak a ngai," a ti a; kut hnathawktute chu hna an thawhna apiangah rinawm taka hna thawk turin a chah.
Vety Minister chuan, kut hnathawktute chu bekang leh vaimin chi an sem aṭangin ṭha taka thar chhuak turin a chah a, "Mizoram mipuiin mamawhna sang tak an neih vangin in thawh ṭhat chuan in hlawkpui ngei ang. Animal insurance pawh ran vulhtute tana thlamuanna siamtu ṭha tak a ni dawn a, insurance man pangngai aia tlawm daihin an nei thei dawn a, an vanneiin an chang ṭha hle a ni," a ti.
Maize and Soyabean Contract Farming for Animal Feed Production hi Bâna Kaih scheme kaltlanga ran chawa intodelhna tur project a ni.