Green-Ag hmanga thawhho dan tur rêl

Agriculture and Farmers Welfare secretary Maria CT Zuali hoin nimin khan Green-Ag project hmalakna puibâwm tura department hrang hrang thawhho dan tur sawiho a ni. Thawhho dan tur an rêl zingah, chul (fallow land) ramngawa siam leh dan tur a tel.

Ṭhutkhawmah hian kum 2026-27 chhung atana ramngaw humhalhnaa hmalakho theih dan tur duan a ni a; Prime Minister Dhan Dhanya Krishi Yojanna (PMDDKY) hnuaia scheme hrang hrang thawhho dan turte sawiho a ni.

Thawhho theihna tur an duante chu - chul (fallow land) ramngawa siam leh dan tur te, ram leilung tihṭhat theihna tura thlai leh thing chìn pawlh dan tur te, khuai khawia hmalakho theih dan tur te, Mizoram Sloping Agriculture Land Technology hmanga huan nghet neih dan tur te, lei chunglâng luang ral tur vennaa hmalakho dan tur te, a huhoa tui hmanna siam dan tur te, damdawi hmang loa lei hànna (nutrient) tihṭhat dan tur te, khaw tina ram kâng vèn dan tur te, túr hmang loa rannung vêk thlai ral suattu (biological control) dotu tur te leh, dan loa sa pelh ven dan tur leh a dangte a ni.