KHAWTHLIR

YMA-in thisen pe

Dawrpui Vengthar Branch YMA chuan nimin khan thisen pek huaihawtin, Civil Hospital, Aizawl Blood Bank tan thisen unit 83 an pe a, petute mipa 77 leh hmeichhia paruk an ni.

Police-in meth man

Champhai police-te chuan Vanthangliana (40) s/o Ngurdawla, New Champhai nia inchhál khalh Scorpio MZ-01 K-0354 aṭangin methamphetamine kg 5.947 an man. Vanthangliana hi a lirthei endik a nih dawnah a tlanchhia a, a hnuah a lirthei a tlansan leh bawk a; mahse, police-te chuan chhui zuiin an man a ni.

Zirlaibu siam dan PS-in sawifiah

Directorate of Printing & Stationery chuan, academic session 2026-27 atana sikul zirlaibute chu State Council of Educational Research and Training-in order a siam angin tluang taka an siam thu an tarlang. Zirlaibute chu Samagra Shiksha, Mizoram leh lehkhabu zuartute hnenah pek nghal vek a nih thu te, district tina zirlaite hnenah sem a nih theih nan district tinah zirlaibute an thlentir hman vek thu an tarlang bawk.

Ha doctor-te tan training buatsaih

State Tobacco Control Cell chuan nimin khan DHME Auditorium-ah sorkar hnuaia dental surgeon (ha doctor)-te tan 'Training of Trainers' an buatsaih. Training hi National Tobacco Control Programme state nodal officer Dr Zoramthangi Renthlei-in a kaihruai a, DHME additional director Dr Zonunmawii Pachuau-in a hmanpui. Damdawi-in tina doctor-te tih tur te, vaihlo sim thei tura damlote puih dan turte leh, dan hnuaia vaihlo aṭanga siamte khuahkhirhnate inzirtir a ni.

Zirlaibu vailiam

Khawzawl district bawrhsap K Vanlalṭhiana chuan nimin khan Khawzawla School Education Complex BRC pisa kawt aṭangin Khawzawl district-a elementary school zirlaite hnena a thlawna sem tur zirlaibu a vailiam. Khawzawl district-ah hian sikul hi cluster psarihah ṭhen a ni a, primary school 40 leh middle school 36 a awm a ni.