Journalist upa bera chhàl piancham lawmpui

Nimin March 25, 2026 kha Padma Shri dawngtu Lalbiakthanga Pachuau, ni tin chanchinbu Zoram Tlangau editor pian champha vawi 99-na a ni a, Assam Rifles 23 Sector chuan Khatlaa an hmunpuiah an lawmsak. Zing karah a inah pipe band nen birthday lawm­puina an hlan bawk.

AR-in Lalbiakthanga Pachuau pian champha an lawmna inkhawmah hian an lainate leh ṭhian te, Army officer-te sipai báng te, chanchinbumite an tel a; Chanmari bialtu pastor Rev. Dr Vanlalruata'n hunserh a hmang a, AR 23 Sector commander Brig. Puspendar Sorayan-a'n thu a sawi.

Lalbiakthanga Pachuau hi British India army niin, World War-II laiin rál donaah a tel tawh a, India leh Pakistan indonaah a tel tawh bawk. Sipai aṭanga a chawlh hnuah chanchinbu lamah kalin, Zoram Tlangau editor a ni zui.

Mizoram Journalists' Association (MJA)-ah president a ni tawh a, MJA chuan prominent journalist-ah an lo puan tawh bakah, MJA leh IPR department ṭang dunin kum 2016 khan India rama working journalist upa berah an puang.

Lalbiakthanga Pachuau hi Association for Voluntary Blood Donation dintute zinga mi niin, hun rei tak president a ni a; pawl pawimawh tak takah hruaitu a ni ṭhin bawk. November 8, 2021 khan India President hnen aṭangin Literature and Education (Journalism) huangah Padma Shri a dawng a ni.