Aizawl dist-ah puitling zinga 4.05%-in HIV vei

Aizawl leh Khawzawla District AIDS Prevention and Control Committee (DAPCC) chu nimin khan an district bawrhsap ve ve kaihhruaiin an ṭhukhawm a, HIV/AIDS donaa hmalak dan tur an rêl. Aizawl district-a awm puitling zawng zawng zinga 4.05%-in HIV an vei tih tarlan a ni.

Aizawl DAPCC hi DC conference hall-ah an ṭhukhawm a, bawrhsap Lalhriatpuia'n a kaihruai. DISHA district programme manager Dr R Zonunmawii tarlan danin, Aizawl district-ah puitiling zinga HIV vei awm zat 4.05% a ni a, kum 15-49 inkarah mi 100-ah mi pali chu HIV hrik pai anga ngaih an ni.

October - November, 2025 chhung khan thingtlang khua 26-a mi 6,504 leh an khaw hruaitute chu HIV chungchang chiang zawka zirtir an ni a, HIV leh syphilis test tihsak nghal an ni.

Aizawl DAPCC ṭhuutkhawmah hian Mission AIDS Suraksha thil tum (95:95:99) a hlawhtlin theih nana hmalak dan tur sawiho a ni a; Mission AIDS Suraksha-ah hian Aizawl district-a HIV vei (PHLIV) zinga 94.5%-in an nihna an inhria a, HIV vei hmuh chhuah tawh zinga 88.5%-in ART an la mek a, 98.3%-te’n mi dang kai chhawng thei lo turin ART hmangin an natna an enkawl a ni.

HIV darh zau zel tur vennaa chak zawka hmalakna atan Integrated Action Plan for Aizawl District chungchang sawiho a ni a; HIV vei leh vei loh inhriat nan mi tam zawk an inendiktir theih nan uar zawka awareness campaign neih te, HIV vei theia ngaihte zinga hmalak te, HIV veite an inhriat chhuah thuai theihna tura hmalak te an rel.

HIV veite rang zawka enkawl an nih theihna tura hmalak te, jail leh home/centre-ahte uar lehzuala inzirtirna neih te, YMA-te nena ṭha lehzuala thawhho dan tur te, thingtlang lama kal tur mobile ICTC leh Bikers Outreach Workers Services tihchangtlung dan tur te, social benefit scheme hrang hrang leh eizawnna ṭha zawk an hmuh theih dan turte sawiho a ni bawk.

Khawzawl bawrhsap K Vanlalṭhiana kaihhruaia a pisaa DAPCC ṭhukhawm chuan, Khawzawl district-a kohhran hrang hrangah HIV/AIDS awareness campaign buatsaih an rêl a; Pathianni zana kohhran hrang hranga chhiar chhuah tur HIV/AIDS awareness chungchang siam ni se, an ti.

Kohhran hrang hrangte'n an kohhran ṭheuhah HIV test an tih theih dan tur te, HIV/AIDS chungchang inzirtirna buatsaih chhunzawm dan tur leh, Khawzawl district-a kohhran pastor ṭhuthmunahte awareness neih dan turte sawiho a ni bawk.