Silk thar tamna hmunpui ni turin Mizoramin theihna a nei - Larsap

Governor Gen. Dr Vijay Kumar Singh chuan, Mizoram Sericulture department-in theihna sang tak a neih thu leh, Mizoram chu silk chi hrang hrang thar tamna hmunpui ni turin theihna a neih thu a sawi.

Gen. VK Singh hian March 24, Thawhlehni zana Aijal Club Park-a Mizorama silk tihhmasawnna leh chawi lârna tura buatsaih, 'Tlangro: The Mizoram Silk Runway' a hmanpuinaah thu sawiin, "Mizoram hi silk chi li - mulberry, eri, muga leh oak tasar tharna state a ni a, silk hrang hrang thar tamna hmunpui ni turin theihna kan nei a, hemi tur hian ṭan kan lak nasat lehzual a ṭul," a ti.

Mizoram chu silk pangang khawina atana sik leh sa duhawm a nih thu sawiin Larsap chuan, "Khawvelah leilung nena inrem natural fibre silk mamawhna a sang zel a, Mizoram Eri silk hi khawvel market-a hralh tla tak tur a ni," a ti a; Sericulture chu thingtlang hmasawnna leh hmeichhiate dâwm kânna atana inmil tak, hna dang nen pawha thawh kawp theih, sum lak luhna ṭha tak a nih thu a sawi.

Governor chuan, silk pangang khawi chu ei leh bâra intodelh theihna a nih thu sawiin, "Hnam ziaráng vawnhimna leh hmasawnna ngêlnghet dinna a ni. Mizoram hmasawnna atan a fawng pawimawha siam turin silk pangang khawitu, sorkar, zirbingmi leh khawtlang inkarah ṭanrualna ṭha a awm a ṭul," a ti.

Gen. VK Singh chuan, muga silk chu hmarchhak state-te nena inzawmna thûk tak nei a nih thu sawiin, "Muga silk tharah Mizoramin hma a hruai thei," a ti a; silk pangang chaw tur thlai chin uar te, pangang khawi inzirtirna changtlung zawk buatsaih te, Mizoram puala muga brand siama chawi lâr te, mawihnái zawka chhuah thei tura sâwngbâwl te, digital platform leh e-commerce nena thlun zawm te aṭul thu a sawi.

Sericulture sector tihhmasawn-na tura pawimawhte sawiin Larsap chuan, "Inzirtirna changtlung, hmanraw ṭha zawk buatsaih, tunlai thiamnate chhawr ṭangkai, hmasawnna ruhrel din leh a hralhna lam ngaihtuah, zirbingna nasa zawk neih, ṭhalai tam zawk hîp, sorkar aṭanga ṭawiawmna tam zawk pek te ngaih pawimawh hmasak a ṭul," a ti.

Tlangro: The Mizoram Silk Runway hi Ministry of Textiles hnuaia Development Commissioner (Handlooms), Mizoram Sericulture department leh National Handloom Deve-lopment Corporation te buatsaih a ni a; chief secretary Khilli Ram Meena leh, Silk Mark Organisa-tion of India CEO Dr Naresh Babu N te pawhin an hmanpui.

Fashion designer Tluangpuii Hmar leh Violeta by Sangzuali te kutchhuak silk thuam chi hrang hrang hmangin fasion show buatsaih a ni.