Zawlsei khuain haw rûnpui an hmang

Zawlsei khua chuan nimin khan Zawlsei khawchhuak haw rûnpui leh martar lungphun hawnna hun an hmang a, bialtu MLA Ramthanmawia'n a hmanpui. Zawlsei haw rûnpui hi vawiinah hman chhunzawm a ni ang.

East Tuipui MLA Ramthanmawia chuan, in 100 chuang awmna khua Zawlseiah kohhran pakhat, Presbyterian Kohhran chauh a awm tih sawiin, "Hei hian khaw inlungrual tak in nihzia a tilang. Khaw inlungrual leh intodelh in nihna leh ration pawh la duh lo khawpa mahni intodelh tlat mi in la awm tih ka hriat hian khaw entawn tlak tak in ni tih a lantir a ni," a ti.

Selesih sangsarih khua tia hriat lâr ṭhin, Zawlsei chu mahni intodelh duhtu an nih avangin Mizo mipuite'n entawn se a duh thu Ramthanmawia chuan a sawi a; ration la lo ngam khawpa intodelh nih ṭheuh tum turin kal khawmte a chah bawk.