Mizo ṭhalaite'n pianpui thiamna an nei ṭha - Governor

ICFAI University, Mizoram leh Labour, Employment, Skills Development & Entrepreneurship (LESDE) department chuan nimin khan ICFAI University-ah 'Skills Development Conclave' an buatsaih a; khuallian Governor Gen. Vijay Kumar Singh chuan, Mizo ṭhalaite'n pianpui thiamna an neih ṭhat thu a sawi.

Gen. VK Singh chuan, Mizo ṭhalaite chu pianpui thiamna nei ṭha leh thawkrim an nih thu sawiin, "India leh khawvel pum inelnaa lang pha turin thiamna dik tak, inpho chhuahna hun ṭha leh inrintâwkna neih chu tun dinhmuna an mamawh a ni," a ti a; India leh khawvel huap pawha inpho chhuahna hun remchang an hmu a nih pawhin, mahni hnam ziarâng leh chawr chhuahna hlamchhiah loa nghet taka vuan zel turin ṭhalaite a chah.

Ram leilung mawi, hnam ziarâng hausa leh ralmuang a nih avangin Mizoramin tunlaia sector ṭhang duang ber service sector-ah hlâwkna a tèl thu sawiin Larsap chuan, "Kut themthiamna tipung turin chin dan thar leh mahni kutkawih eizawnna kalkawptir thiam a ṭul. Skills Conclave hi sawihonaah tawp lo se, hma lam panna, kawng dik inkawhhmuhna, infuih tharna leh danglamna thlentu a nih ka duh," a ti.

Governor chuan, ṭhalaite chu state leh ram pum tana ro hlu leh innghahna an nih thu sawiin, "Khawtualah lungawi mai lo a, India mai ni lo, khawvel hmun dang thlenga hlawhtlinna chan tum ang che u. Themthiamna tihhmasawn leh kutkawih eizawnna chawi lâr turin kawng dik leh boruak ṭha siam a ṭul," a ti a, thiamna chu hlawhtling tura pawimawh a nih thu a sawi.

Conclave-ah hian ICFAI University vice chancellor Ginlianlal Buhril-in inlawmna thu a sawi a, LESDE director John Ṭanpuia pawhin thu a sawi. India ram hmun hrang hranga mithiam telte'n 'From Mizoram to the World' tih leh, 'Mizo youths reaching out to Pan India' tih thupuite an sawi a, sawihona hun hman a ni bawk.