2026-27 LMC budget Rs 18,95,62,000

Lunglei Municipal Council (LMC) Board of Councillors (BoC) chu March 24, Thawhlehni khan BoC Meeting Hall-ah an ṭhu a, vice chairman K Lalrinawma'n a kaihhruai. Kum 2026-27 chhunga LMC budget atan Rs 18,95,62,000 pawm a ni.

K Lalrinawma chuan, Mizoram sorkarin LMC a enkawl dan leh a duhsaknaah an lawm thu sawiin, "Lunglei khawpuiin kawng hrang hranga hmasawnna hmel a hmu chho zel hi a lawmawm hle a ni," a ti a; LMC councillor-te'n ward an enkawlnaah theihtawp an chhuah nia a hriat thu leh, eirûkna leh hlemhlêtna lakah an fihlim tlâng hlea a hriat thu a sawi.

LMC BoC ṭhutkhawmah hian kum 2026-27 financial year-a LMC budget atan Rs 18,95,62,000 pawm a ni a; LMC huam chhungah veng fai inelna buatsaih rêlin, a ṭula hman atan Rs 5,00,000 an ruahman. LMC huaihawta a ṭum khatna atana Lunglei Ní hman dan thlir let a ni a, kum dangah pawh changtlung leh uar zawka hman ṭhin ni se, an ti.

Rural Development & Administration department-in LMC hnena Lunglei Park a hlan tâk enkawl dan tur sawiho a ni a; hun remchang hmasa berah councillor-te'n a huhoin a hmunah hmalak dan tur enho an rel a ni.