KHAWTHLIR

Kawngpui zatve khâr ṭhin dawn

Bawngkawn kawn phei, Sairang pêng leh Durtlang pêng inkarah March 30, 2026 aangin zan dar 8 aṭanga a tuk zing dar 6 thleng pipe phûm hna an thawh ṭhin a ni dawn. Pipe phûm avang hian hna thawh chhung zawng Bawngkawn kawngpui zatve khar ṭhin a nih dawn thu Traffic SP C Vanlalvena chuan a tarlang.

Diaspora Cell hnathawh sawiho

March 24, Thawhlehni khan CMO conference hall-ah Mizo Diaspora Cell hotute leh Mizoram pawna Mizo pawl hrang hrangte'n online-in Mizo Diaspora Cell hnathawh dan leh Mizo DiasporaHub hman ṭangkai dan tur an sawiho. Sawihona hi Mizo Diaspora Cell chairman Vanlaldina Fanai, CM secretary-in a kaihruai a, zawhna leh chhanna hun hman a ni.

Inkahsiak buatsaih

Environment, Forest & Climate Change department-a Kawrthah Forest Division leh Kawrtethawveng VC ṭang dun chuan March 24, Thawhlehni khan Kawrtethawveng Tennis Court-ah Air Rifle Shooting Competition an buatsaih. Intihsiak hi Hachhek biala silai neitute'n an silaite nungcha tihhlumna atan hmang lo a, intihhlimna leh inelna lian zawk hmachhawn theihna tura buatsaih a ni a, mi 33 an tel. Thupui chu 'Shoot with a camera, not a gun' tih leh, 'Aim for peace, not the beasts' tih a ni.

Tung chìn inzirtir

Agriculture & Farmers Welfare department chuan March 24, Thawhlehni khan Lunglei district chhung khaw 32-a tung chingtute pualin tung chìn dan zirhona an buatsaih a, Lunglei district agriculture officer Dr Samuel Lalliansanga'n a hawng. Mithiamte'n tung chìn dan, enkawl dan, sawngbawl dan leh hralh chungchang an zirtir a; zawhna leh chhanna hun hman a ni.

Zemabawk West LC tharah inthlang

State Election Commission chuan nimin khan Zemabawk West Local Council tharah LC inthlan a buatsaih a, tluang taka vote thlak niin, vote 69.91% a tla. Vote tlate hi nizan khan chhiar nghal a ni a, result kan hre hman lo. Zemabawk West LC hi din thar a ni a, tun ṭuma inthlan hi an inthlan hmasak berna tur a ni.