KHAWTHLIR

MJA inkhawmpui

Mizoram Journalist Association (MJA) chuan vawiin hian IPR Auditorium-ah general conference an hmang dawn a, Finance secretary Ramchuana'n a hmanpui ang. MJA inkhawmpuiah hian chawhnu lamah rorel a nih dawn bakah hruaitu thar an thlang dawn.

KṬP-in thisen pe

KṬP, Lily Veng North Branch chuan an branch din champha pualin nimin khan an kohhran hall-ah thisen pek huaihawtin, Synod Hospital tan mipa 16 leh hmeichhia pangain thisen unit 21 an pe.

Sarêp hâl ral

Chhimtuipui Wildlife Division-in March 15, 2026-a dan loa zawrh ramsa rêp an man chu Lawngtlai District Court-in phalna a pek angin March 25, Nilaini khan an hal ral. Heng sarêp an man kaihhnawihah hian Mamte, Lunglei district khaw mi pali chu Wildlife Protection Act 1972 hmanga thubuai siam sak an ni.

MSU-in hmala dawn

MSU Gen. Hqrs Executive Committee nimina ṭhukhawm chuan, sorkar hnathawk aikal la report an dawnte bawhzui dan tur an rel a; aikal la report hi mi 12 an nih thu leh a tam zawk hi zirtirtu an nih thu tarlan niin, hei hi zirlaiten an tawrh theih avangin aikal lak hi tihtawp a nih theih nan chak taka hmalak an rel. Aikal la hriate chu MSU-ah report zel turin mipui an ngen bawk.

Chawimawina dawng

The Leprosy Mission, Mizoram executive secretary Rev. TC Zodinsanga chuan tun hnai khan Andhra Pradesh-a Bapatlla District Leprosy, AIDS & TB officer Dr V Somala Naik hnen aṭangin chawimawina certificate a dawng. Chawimawina hi Bethany Colony Leprosy Association, Andhra Pradesh enkawl phâr colony tana a inpekna, thawhrimna leh ṭanpuina kawnga a thawh hlawk avanga pek a nih thu tarlan a ni.

SCC tinah sawhthing hralh

Mamit DC Suvigya S Chandra kaihhruaiin March 25, Nilaini khan DC conference hall-ah District Agricultural Marketing Committee an ṭhukhawm a; Mamit district-a sawhthing hralhna secondary collection center (SCC) pasarihah sawhthing hralh kalpui mek a nih thu tarlan a ni.