ZPM sorkarin a ngaih pawimawh ber zinga mi chu ram leh hnam humhalh a ni - Lok Sabha MP

Lok Sabha MP Richard Vanlalhmangaiha chuan nimin khan Janakpuri, New Delhi-ah Burma Mizo Community (BMC)-in Chapchar Kût an lawmna hmanpuiin, ZPM sorkarin a ngaih pawimawh ber zinga mi chu ram leh hnam humhalh a nih thu a sawi.

Richard Vanlalhmangaiha chuan, ZPM sorkarin a ngaih pawimawh ber zinga mi chu ram leh hnam humhalh a nih thu a sawi a, "Hnam inpumkhatna hi kan Chief Minister pawhin a ngaih pawimawh êm avangin state danga Zo hnathlakte thil tihahte pawh sawm a lo ni fo tawh a, hnama min siamtu hi Pathian a ni a, khawi hmunah pawh awm ila, Mizo kan nihna hi chawisang zelin, hnam dang karah pawh Zo nun ze mawi i chhuah zel ang u," a ti.

Zo hnahthlakte chu an awmna hmun a zirin ramriin a ṭhendarh thu sawiin Richard Vanlalhmangaiha chuan, "Kan awmna avangin ramin min ṭhen a nih pawhin, kan hnam hi chu Lalpa min pek, Lalpa din a nih avangin a boral ve dawn lo a, kan inpumkhat tlat tur a ni. Hnam tiboral emaw, ṭhendarh zawng emawa che an awm a nih chuan Lalpan a ti boral zel dawn," a ti bawk.

Burma Mizo Community-ten kumina Chapchar Kût an hman hi a vawi 19-na a ni a; thupui atan 'Zo nun ze mawi - Lungrualna' tih an hmang. Hnam lam leh zai hrang hrangte entir a ni.