CM Special Package progress partner hnenah certificate leh pawisa hlan

Lunglei district bawrhsap Navneet Mann chuan March 25, Nilaini khan a pisaah Bana Kaih (Handholding) Scheme Phase–II hnuaia Lunglei district-a Chief Minister's Special Package ṭanpuina dawng tura thlan (progress partner) hnenah certificate a hlan.

Navneet Mann chuan, Bana Kaih Scheme chu Mizoram sorkar flagship scheme a nih angin department-te leh progress partner-te pawhin tih tak takna nena an kalpui a ṭul thu a sawi a, "A tihhlawhtlin kawngah ṭha taka thawhhona leh ṭanrualna a pawimawh. Phase–II hnuaiah ṭanpuina dilna hun hawn mek a ni," a ti a; Lunglei district mipuite chu he scheme hi ngaihven tura chahin, dilna lut aṭangin hma la tak tak turte chu CM Special Package leh loan component-ah progress partner atan thlan zel tur an nih thu a sawi.

Sorkar hotute'n progress partner tana hriat tur pawimawh hrang hrang sawiin, an hmalakna kawngah department mithiamte ráwn hreh lo tur leh hlawhtling ngei tura hmalak tum turin an chah a; an hmalakna chu a theih ang anga an vil zui tur thu an sawi bawk.

Bana Kaih Phase–II hnuaiah hian Lunglei district-ah CM Special Package progress partner turin Lalnunmawia, Ṭawipui South thlan a ni tawh a; Lalnunmawia hian ar vulh (poultry farming)-ah CM Special Package aṭangin ṭanpuina Rs 50,000 a dawng dawn a, direct benefit transfer (DBT) hmangin a bank account-ah thun tura ruahman a ni.