Handholding Scheme zirhona buatsaih

Adviser to CM Dr Lorraine Lalpek-liana Chinzah, MLA hoin March 25, Nilaini khan Lawngtlai DC conference hall-ah District Level Workshop on Handholding Scheme neih a ni a; MLA chuan, Handholding Scheme hi miharsa zawkten lei rem an rah theih nana sorkarin a ruahman a nih thu a sawi.

Dr Lorrain Lalpekliana Chinzah chuan, Handholding Scheme kalpui kawnga line department-te ṭhahnemngaihna leh thawhrimnate fakawm a tih thu a sawi a, "He Handholding Scheme hi miharsa zawkten lei rem an rah theihna tur, miharsa zawk tih tak tak tum leh eizawnna duh tana sorkarin a kalpui mek a ni. Lawngtlai dsistrict bik hi district hnufual kan ni a, kan mi leh sate Handholding Scheme kaltlanga an dinhmun kan siam a ngai a, chumi atan chuan Lawngtlai district hi kan tihchak a ngai a ni," a ti.

Handholding Scheme hlawhtlinna tur atana pawimawh chu bank-te an nih thu sawiin MLA chuan, "Line department-in felfai takin ruahmanna siam mah se, bank-in an pawmpui loh chuan tih ngaihna a awm lo," a ti a; bank lamte pawh ṭan la zual a, Handholding Scheme kaltlanga loan dilnate ngaipawimawh turin a chah bawk.

District bawrhsap Donny Lalruat-sanga pawhin thu sawiin, handholding hi bul ṭan chauh mah ni se, a hlawkna têltu tam tak an awm tawh thu a sawi a, "Kan district-ah pawh hmalaknna a kal mek a, kan thlen chinah hian hma kan sawn mek zel a ni. Tun platform-ah hian a tak taka tihlawhtlingtu chu bank-te kan ni a, department-in ruahmannate a siam a, an lo recommend-te bank aṭangin verification-te neiin, ṭanpuina dawng tlaka an ngaihte pek an ni," a ti a; scheme hnuaia ṭanpuina diltute tan theihtawp chhuah turin line department leh bank hotute a sawm.

Tarlan danin, Bana Kaih Scheme Phase II hnuaia CM Special Package-ah Lawngtlai district aṭanga dila 411 zingah paruk pawm a ni tawh a, loan component bikah dilna 10 thehluh a ni tawh. Phase-I hnuaiah khan Lawngtlai district aṭangin loan component-ah mi 10 hnenah loan pek a ni tawh.