Dik leh felfai taka thil tih a nih theih nan filling station leh gas agent-teah CCTV vuah dawn

Siaha district bawrhsap VL Hruaizela Khiangte kaihhruaiin March 25, Nilaini khan a pisaah Siaha district-a tuialhthei leh eirawngbawlna gas dinhmun sawiho a ni a; dik leh felfai taka tuialhthei leh eirawng-bawlna gas lei/hralh a nih theih nan filling station leh gas agent tinah CCTV vuah an rel.

VL Hruaizela Khiangte chuan, March 20, 2026 khan tuialhthei lei leh hralh chungchangah thupek chhuah a nih tawh thu a sawi a, "Siaha district tana lo thleng tuialhthei leh eirawngbawlna gas hi hmun dang leh ram dangah a chhuah kan remti lo, ram chhunga cheng mipui (consumer)-te hi dah pawimawh hmasak ber tur a ni," a ti a; kawnga thang mek pawh a thlenna tur hmun thleng loa hruaikawi leh khawih chingpen a awm loh nan chak taka hmalak a nih thu a sawi.

Mipuite chu thuneitute thu ngaichang thiam tura chahin Bawrhsap chuan, "Ṭha taka thupek zawm a nih hian mipuiten rualkhai takin kan ni tin mamawh tâwk ṭheuh kan chang thei a, chutiang ni loa mahni duh zat zat kan lei chuan mi dang tan harsatna kan siam thei a ni," a ti a, ûm leh thàwl hmanga tuialhthei la lo tur leh thawkte pawh chutianga lak phal lo tur chuan a chah nghal bawk.

Ṭhutkhawmah hian Siaha district joint control room member - district administrator, police, DCSO leh DIPRO official-te an tel a; Siaha district chhungah dik leh felfai taka tuialhthei leh eirawngbawlna gas lei leh hralh a nih theih nan filling station leh gas agent-ahte CCTV vuah ni se, District Adminis-trator, SP leh DCSO-ten vil se, an ti.

Tun dinhmunah ni tin mamawh a thlen ṭhat thu leh district chhunga cheng mipuite tan tuialhthei leh eirawngbawlna gas-ah thlaphanna tur a awm loh thu an sawi. Siaha district-a tuialhthei leh eirawngbawlna gas chungchanga zualko duh emaw, thu chiang zawk hre duh emaw tan phone number 6909538406, 6909716830-ah hriattir leh zawhfiah theih a nih thu tarlan a ni.