Governor-in PIB Press Tour Team-te a kawm

Governor Gen. Vijay Kumar Singh chuan nimin khan Lok Bhavan-ah Press Information Bureau (PIB), Jalandhar, Punjab bultuma Mizorama press tour neia lo zin Punjab leh Himachal Pradesh aṭanga chanchin-bumi pariatte a kawm.

Governor Vijay Kumar Singh chuan, Mizoram chu state tê leh mihring tlemna ni mah se, Myanmar leh Bangladesh kar cheha awm a nih avangin India rama hmun pawimawh tak leh Act East Policy-a hmun langsar tak chang pha a nih thu a sawi a, "Ramri lehlama chengte nena inlaichinna ṭha tak nei a nih avangin boruak a ralmuang a, buaina lian tham chhuak a awm meuh lo. Tun hmain Mizoram chu rambuai ni mah se, Mizoram Peace Accord, 1986 ziah hnuah state ralmuang tak a ni," a ti a; tun hnaiah India rama ziak leh chhiar thiam vekna state hmasa ber leh sawhthing khawpui 'Ginger Capital of India'-a puan a nih thu sawiin, hmasawnna dangte pawh chak taka kalpui chhoh zel a nih thu a sawi.

September 13, 2025-a Prime Minister-in Bairabi-Sairang rel kawng thar a hawn chu danglamna lian thlentu a nih thu sawiin Governor chuan, "Zorinpui thleng turin chhim lamah km 200 chuang a thui siam chhunzawm tum a ni a, Kaladan Multi-Modal Transit Transport Project (KMMTTP) va pawh a, Paletwa leh Sittwe Port, Myanmar nena thlun-zawm tum a ni. A zawhfel hunah chuan Mizoram mai bakah hmarchhak state leh India ram pum tana hmasawnna lian thlentu a ni dawn," a ti.

Governor chuan Mizoram chu ramri depa awm a nih avangin ramri kaltlanga ruihhlo tawlh pawh man tur a awm fo thu leh, sorkarin dan loa ramri kaltlanga ruihhlo tawlh leh sumdawnnate theihtawp chhuaha a do zel dawn thu a sawi a; Mizoram chu tribal tamna leh Kristian sakhua vuantu tamna a nih thu sawiin, kohhran, YMA leh NGO dangte'n khawtlang leh state inrelbawlnaah hmun pawimawh tak an chan thu a sawi bawk.

PIB Press Tour Team-te hian an cham chhunga Mizoram an hmuh dante leh hmasawn zel tura pawimawh nia an hriatte Governor hi an sawipui a; Mizoram chu mawi an tih thu leh ṭha taka traffic dan zawm a ni te, bengchheng ngaimawh tur a awm lo te, khua leh tuite'n inthununna ṭha neia dan an zawm ṭhate chu entawntlak an tih thu an sawi a ni.

Press Tour Team hi PIB, Jalandhar media & communication officer Dr Vikram Singh chuan a rawn ho a; Governor nena hun an hman honaah hian PIB, Aizawl head of office Dr Rajeev Lourembam chuan a ṭawiawm.