Champhai district-a hmun 4-ah sawhthing sawngbawlna din dawn

Horticulture minister C Lalsawivunga chuan nimin khan Vaphai Community Hall-ah USP Ginger, Greenhouse Cluster leh sapthei chìn beihpui thlakna tur a hawng. Champhai district-a Mualkawi, Zotlang, Vaphai leh Tualchengahte sawhthing sawngbawlna din a nih dawn thu tarlan a ni.

C Lalsawivunga chuan, "Ministry of DoNER–in Unique Selling Proposition (USP) atana a thlan hnuaiah sawhthing thar tamna ber Champhai district-ah sawhthing sawngbawlna tur ruahman mek a ni a, Ginger Hub hi Mualkawiah din tum niin, spoke pathum - Vaphai, Tualcheng leh Zotlangahte din tum a ni," a ti.

Vaphai khuain duhsakna an dawnte chu ropui a tih thu sawiin Minister chuan, "He duhsakna hi thawhrimna, taimakna leh rinawmnaa chhànlêt tur a ni a, hlawhchham mai mai lo tur leh hlawhtlinpui ngei turin theihtawp chhuah ang che u," a ti a; animal insurance chungchangah, "Tun hmaa vawk pakhata Rs 2,000 chawi ngai ṭhin kha tunah chuan state matching share-in 15% chauh chawiin Rs 292-a insure theih a ni tawh," a ti bawk.

Horticulture director CH Lalmuanpuia pawhin thu sawiin, sawhthing sawngbawlna (spoke & hub) hi Champhai district-a Mualkawi, Zotlang, Vaphai leh Tualchengahte bun a nih dawn thu a sawi a; intodelha taima taka theihtawp chhuah a ṭul thu a sawi.

Hawnna inkhawmah hian sorkar hotute leh khawtlang hruaitute bakah, Greenhouse Cluster Sesih Zau, Vaphaia Greenhouse enkawltu tur mi 21 leh sapthei ching tura thlan mi 40-te an tel a ni.