Hmarcha leh cocoa-ah sorkar laipui hotute kawm

Agriculture & Farmers’ Welfare minister PC Vanlalruata chuan March 26, Ningani khan Kochi, Kerala-ah Ministry of Agriculture & Farmers’ Welfare hnuaia Directorate of Cashew Nut & Cocoa leh Ministry of Commerce & Industries hnuaia Spices Board of India hotute an pisaah a kawm a; Mizorama hmalak theih dan tur hrang hrang a sawipui.

PC Vanlalruata hian Directorate of Cashew Nut & Cocoa director Dr Femina leh thawhpuite a kawm a; Dr Femina chuan presentation pe-in, Mizorama cocoa ṭhat theih dante a sawifiah bakah, loneitute hmasawnna turin uar taka cocoa ching ve turin Minister chu a sawm a, hemi kawngah hian sorkar laipui chuan kawng hrang hranga ṭanpuina pek a inhuam thu a sawi.

Spices Board of India secretary P Hemalatha chuan spices crop lamah Mizoram hmasawnna tur hrang hrang a awm thu leh a bikin Mizo hmarcha (Mizo Birds Eye Chilli)-ah market demand a ṭhat thu Minister hi a lo hrilh a; nasa lehzuala thar chhhuah a nih theih nan sorkar laipui leh Mizoram sorkarin thawhhona ṭha zawk neih chhoh zel ni se, an ti.

Agriculture Minister hi Agriculture & Farmers’ Welfare secretary Ramdinliani, consultant Tlangtimawia Zote leh ADAO Lalrinzuala ten an ṭawiawm a ni.