KHAWTHLIR

Project endik tawhte thlirho

Mizoram State Project Monitoring Committee chuan March 25, 2026 khan an vice chairman R Lal Rinawma kaihhruaiin Planning conference hall-ah tun hnaia project 16 an endiknate an thlirho a; Nodal Department, Executing Department leh Contractor-te'n hnathawh kal mek leh MSPMC-in rawtna a lo siam tawhte an bawhzui dan an report bawk. April, 2025 - March, 2026 chhungin MSPMC hian project hrang hrang 72 endikin vawi 82 an fehchhuah thu tarlan a ni.

VC 6 by-election final roll tlangzarh

Siaha district-a Village Council paruka inthlan ṭhatna (by-election) atana hman tur final electoral roll chu nimin khan assistant district election officer Abraham Beirazi Khithie, additional DC-in a tlangzarh. VC by-election neihna tur khuate hi general seat vek a ni a - Meisavaih East (seat 2), Thosai (seat 1), College Vaih II (seat 1), Noaotlah III (seat 1), Tipa V-III (seat 1) leh Khaikhy (seat 1)-te niin, heng VC parukah hian vote nei 2,521 (mipa 1,179 leh hmeichhia 1,342) an awm a ni.

Fisheries Secy-in tlawh

Fisheries secretary Lalrothanga chuan nimin khan Ṭamdil a tlawh a, Forest department hotute nen dil luanchhuahna lama tui pût rute enfiahin, siamṭhat dan turte bakah, sangha chi siamna leh dil lo awm tawhte thawmṭhat a ṭul dante sawiho a ni. Khawzawl Tuisen Phai Zau leilet neitute leh Champhai district-a mimal sangha chi siamna hmunte a tlawh nghal a ni.

Chaltlang tih zawk tur

Mizoram Pradesh Congress Committee (MPCC) chuan AMC inthlanpui neih tura Ward no. II-a an candidate Lalrindiki Chawngthu, Ramhlun North tia an tarlan chu Chaltlang tih tur zawk a nih thu an tarlang a; "Dt 23.3.2026-a MPCC-in candidate kan puanah khan Ward No. II Lalrindiki Chawngthu, Chaltlang tih tur kha Ramhlun North tiin kan lo ziak a, tihsual palh a ni a, Chaltlang tih zawk tur a ni e," an ti. Nimin Vanglaini chhuakah pawh Ramhlun North tia tarlan a ni a, Chaltlang tih zawk tur a ni e.