Theihtawp kan chhuah chuan khawvelah kan langsar thei - Chief Minister

Ni thum awh International Paragliding Accuracy Championship, 2020 chu February 15, Inrinni khan khar a ni a, khuallian chief minister Zoramthanga chuan Mizo mipuite'n theihtawp kan chhuah chuan khawvelah kan lansarh theih tur thu a sawi.

Chief Minister chuan paragliding intihsiakna hlawhtling tak neih a ni chu lawmawm a tih thu sawiin, "Mizoramin a vawikhatna atana international level championship a thleng hi a ropuiin, nakin zelah pawh khawvel huap paragliding intihsiakna hi kan thlen leh zel a beiseiawm hle. He intihsiakna hi Mizoram leh India ramah a ṭhan len zel ka beisei," a ti.

Mizoram chu ram te takte, hmasawnna lamah ram changkang zawkte nena khaikhin chuan la sang lo tak a nih thu sawiin, "A chhung a chengten theihtawp kan chhuah a, tihtak zeta kan thawh chuan khawvelah kan langsar thei a ni," a ti a, khawvela langsar thei tura theihtawp chhuahpuiah mipuite a sawm.

Khualzahawm Tourism minister Robert Romawia chuan championship nghahna hmun chu paragliding-na hmun nghet a nih theih tur thu sawiin, "Khawvel hriat a India ram leh Mizoram pho chhuah theihna hmun tur a ni, tuna championship kan thlen pawh hi Serchhip emaw Mizoram in a thleng chauh ni loin, India ramin a thleng a ni," a ti.

Inkhawm hi Tourism secretary Esther Lalruatkimi'n kaihruaiin, bialtu MLA Lalduhoma leh Tuirial bialtu MLA Andrew H Thangliana-te pawh an tel.