KHAWTHLIR

Tui sawiho

Irrigation & Water Resources secretary Lalrothanga chuan March 28, Inrinni khan a Champhai tlawh a, IWR department hnuaia pilot project, 'Modernisation of Command Area Development' hnuaia Water User Society member-te a kâwm. Project-in a tum angin loneitute’n tui hnianghnar zawka an neih theihna tura ruahmannate sawiho a ni a, pump house leh solar plant dahna hmun turte tlawhin an enfiah nghal a ni.

Kolasib bawrhsap

Kolasib district bawrhsap atan Mizoram sorkar chuan H Dolianbuaia, MCS a ruat. H Dolianbuaia hi Cooperation department leh Sports & Youth Services department joint secretary ni lai a ni a; Kolasib DC a nih laia tun hnaia thi ta Robert C Lalhmangaiha a thlak dawn a ni.

Rialin in 41 tichhia

March 28, Inrinni chawhnu khan rialin Thaltlang khuaah in 41 a tichhia. Thu dawn danin, Thaltlang hi Lawngtlai district-a Sangau RD Block chhunga awm a ni a; in 13 chu luah zui tlak lohin rialin a tichhia a, in dang 28 a chhe nual bawk. Lawngtlai bawrhsap Donny Lalruatsanga chuan mamawh hmasaa hman atan nimin khan tarpauline eng emaw zat Thaltlangah a thawn a ni.

Mithiamte rawn zin

Greens Zoological, Rescue & Rehabilitation Centre mithiamte chuan an director Dr Brij Kishor Gupta hoin tun hnai khan Mizoram an rawn tlawh a; Mizoram sorkarin African Swine Fever hripui a do mek leh nungcha humhalhna tihhmasawn kawnga pui turin Mizoram hmun hrang hrang an tlawh. Mithiamte hian March 26-29, 2026 chhung khan EFCC Minister, Rural Development Minister leh Animal Husbandry & Veterinary department hotute an kâwm a; Epidemiological Centre, College of Veterinary Sciences, Mizoram University leh Aizawl Sahuante an tlawh bawk.