Aizawlah Faina Hnatlangpui neih a ni

Urban Development & Poverty Alleviation (UDPA), Aizawl Smart City, Aizawl Municipal Corporation (AMC) leh Central YMA buatsaihin March 28, Inrinni khan Aizawlah Faina Hnatlangpui huaihawt a ni a; veng hrang hrangah mi ṭhahnem tak an thawk chhuak.

Faina Hnatlangpui hi zing dar 7-ah Vanapa Hall kawtah UDPA secretary Lalmalsawma Pachuau-in a hawng a; 'City Branch YMA Fai Intihsiak ' a hawng nghal bawk.

Hnatlangpui hawnna inkhawm hi AMC commissioner Joseph H Lalramsanga'n a kaihruai a; khuallian UDPA Secretary bakah, CYMA general secretary Prof. Malsawmliana ten thu an sawi.

Lalmalsawma Pachuau chuan, ram leh hnam hmangaihna kawngah faina ngaih pawimawh a ṭul thu a sawi a, "Mizo mipuite'n mahni ram tia chhàl tur kan nei hi thil hlu tak a ni tih hriain, a enkawl leh tihfai kawngah pawh mawhphurhna kan la tur a ni. Fai hi thil hlawk tak a ni a, ram pawn aṭanga Mizoram lo tlawhtute hîptu pawimawh tak leh ram economic value tisangtu pakhat chu faina hi a ni," a ti.

Hawnna inkhawm zawhah tlawmngai pawl ṭhenkhat leh sorkar department ruat bikte'n Lammual leh a chhehvel an tifai nghal a; Hnatlangpui huaihawttute ruahman angin, hmun thlan bik hrang hrangah mi eng emaw zat an hnatlang a; Aizawla YMA branch hrang hrangte an veng chhung ṭheuhah an hnatlang. Chhiat tawhna avang leh rokhawlhna dang vanga hnatlang thei lo YMA branch an awm bawk.

Faina Hnatlangpui pual hian bawlhhlawh tamna leh hmun ṭawp zual lai 15 thlan chhuah a ni a; chu'ngte chu a hnaivaia awm YMA branch-te'n an tifai. Khuain a bumro avangin Faina Hnatlangpui hi hmun tam takah a khaihlak a ni.

Coordination Committee chuan, Faina Hnatlangpuia tlawmngai pawl hrang hrang thawk chhuakte chungah lawmthu sawiin, theihtawp chhuah chhunzawm zel turin a ngen. Aizawl City YMA Branch Fai Intihsiakna 2026 buatsaih leh turah fai lawmman la thei tura ṭan la thar ṭheuh turin YMA branch tin an ngen bawk.

Sorkar thuchhuah tarlan danin, hnatlangpui hi 'Comprehensive Plan for Municipal Solid Waste Management in Aizawl' tihhlawhtlinna tur pakhat a nih bakah, Aizawl khawpui hi India rama khawpui fai ber leh bawlhhlawh awm lohna 'Garbage Free Aizawl' a nih theihna tura hmalakna zinga mi a ni.