Ṭha zawka hna thawh dan tur zirho

Department of Personnel & Administrative Reforms (Good Governance & Training Wing) bultumin March 27, 2026 khan sorkar hnathawkte'n mipui tana ṭangkai zawk leh ṭha zawka hna an thawh theihna tura ruahmannate sawihona, 'State Consultative workshop on Institutionalizing Capacity Building: From Training to performance linked Governance' neih a ni a; chief secretary Khilli Ram Meena-a'n a kaihruai.

Sawhona hi Secretariat conference hall-ah neih niin, sorkar department hrang hrang hotute leh Mizorama training institute ṭhenkhat aiawhte an tel. Sorkar hnathawkte'n an hna chanpual mila an mamawh training an neih theih dan tur te, Administrative Training Institute (ATI) leh training insitution dangte tihchangtlun chungchang te, mimal tinte mamawh zirna ṭha pek nana artificial intelligence leh technology dangte a ṭangkai thei ang bera hman leh sorkar hnathawkte'n an hna vawn lai mil tura training an lo neih tawh ṭhinte ṭha leh awlsam zawka tunlai thiamna mila thuamṭhat chungchangte rel a ni.

Sorkar laipui hnuaia Department of Personnel & Training-a thehluh tur report duan tur te, Sadhana Saptah (April 2-8, 2026) hman dan tur chungchanga department tinte hmalak dan tur duan leh hemi chhunga iGOT Karmayogi course ruat sa zawh dan tur thute an sawiho bawk.

Workshop hi National Departmental Summit, May 15-16, 2026-a awm tur atana Mizoram sorkar inbuatsaih lâwkna a ni a; Mission Karmayogi leh Viksit Bharat 2047-te nena inmil tura state hmalakna her remte chu he workshop-in a thil tum pawimawhte an ni.

RAWTNA LANGSAR ZUAL

◉ ATI kaihhruaina hnuaia district hrang hrangah Centres of Excellence din.

◉ Capacity Building Plans (CBPs), iGOT, leh HR system-te thlunzawmna hmunpui (integrated ecosystem) siam.

◉ Mizo ṭawng ngeia hman theih tur AI hmanga zirna platform siam.

◉ ATI Mizoram chu training leh thawhhona kawnga khaipa ber (apex institution) ni tura tihchak.