Jail awm ngai lo khawpa ṭan la turin Minister-in MHIP member-te a chah

Minister of state F Rodingliana chuan, ṭhalaite nun siamṭha turin hmeichhiate an pawimawh thu sawiin, jail awm ngái lo khawpa ṭan la turin MHIP member-te a chah.

F Rodingliana hian March 27, 2026 khan Ngopa Jubilee Hall-ah MHIP, Saitual Sub-Headquarters Conference vawi 3-na a hmanpui a; Aizawlah hmeichhiate chu an dinhmunin a zir loh avanga inzuar leh mipa hnathawk thei loa home leh jail-a dah eng emaw zat an awm thu sawiin, "Tam tak chu nu leh pa inṭhen, enkawltu mumal nei lote an ni. Ṭhalaite nun siamṭha turin hmeichhiate in pawimawh a, jail awm ngai lo khawpin MHIP-te hian ṭan la ang che u," a ti.

Mizoramah khualzin an pung zel tih sawiin Minister chuan, "Hotel ṭha leh zu in tur duh vanga Mizoram tlawh an ni lo a, Mizo hnam ze mawi leh inhmangaih tawnna chu an hmuh duh ber zawk a ni a, ṭan kan lak thar a ṭul hle. Kan Mizo thuam hrang hrangte hi chawi nung zel turin ṭan la ila, sorkar pawhin Mizo thuam chawilar turin hma a lak mek," a ti a; MHIP-te chu ṭan la thar zel turin a fuih.

MHIP, Saitual Sub-Headquarters Conference hi an president Lalbiak-tluangi'n a kaihruai a; inkhawmpui thupui chu 'Mite ṭanpui' tih a ni. MHIP Gen.Hqrs vice president Ngurmawii Sailo leh Aizawl District Legal Services Authority senior civil judge cum secretary Lalhriatpuii ten thu an sawi bawk.