Phûllem phah tur lungphùm phúm

Minister of state B Lalchhanzova chuan March 27, 2026 khan Thenzawla Loṭhazawl khelmuala phûllem (artificial football turf) phah tur lungphùm a phúm a; phûllem phah dan tur lehkha an sem chu dahṭha a, siam zawh a nih hunah a nih tur ang a ni em tihte thlenga lo vil zui turin mipui a chah.

B Lalchhanzova chuan, phûllem phah tur chu Thenzawl leh a chhehvel khaw mipuite'n neitu thinglung puin vil se a duh thu a sawi a, "Hmasawnna hna thawh a nihin eng emaw chen khawtlangah harsatna a thlen châng a awm ṭhin a, chu'ngte chu inhuam a ngai dawn. Vawiina artificial football turf siam dan tur lehkha an sem hi lo dahṭha ula, siam zawh a nih hunah a nih tur ang a ni em tihte thlengin lo vil zui ang che u," a ti.

Minister chuan, eizawnna atana infiamna hmang tur chuan hmunhma ṭha a pawimawh rualin, infiammite inbuatsaihna a pawimawh tel thu a sawi a; intihsiakna piah lamah, nuntih hlimna tur leh insawizawina hrim hrim atan pawh infiamna a hlut thu a sawi bawk.

Mizoram State Sports Council secretary Henry C Lalrawnkima tarlan danin, Thenzawl Loṭhazawla phûllem phahna atan hian Ministry of Minority Affairs hnuaia Pradhan Mantri Jan Vikas Karyakram (PMJVK) aṭangin June 11, 2025 khan cheng vbc 11.856 hmuh a ni a; hna thawktu tur (contractor) zawnna atan open tender chhuah niin, Décor India, Guwahati, Assam thlan a ni. February 24, 2026 khan contractor hnenah work order pek a ni a, work order amount chu cheng vbc 10.33 a ni.

Phûllem phah tur chu a dung metre 111 leh a vâng metre 76-a zau tur a ni a, football khelmual tur bik chu a dung metre 105 leh a vâng metre 70 a ni ang. Phûllem phah tur hi FIFA pawmpui quality 60mm (pile height) a ni.