MoS-in sports leh tourism lama hmasawnna atan ADB a dawr

Minister of state (MoS) Lalnghinglova Hmar chuan a department enkawl pahnih - Sports & Youth Services leh Tourism lama hmasawnna atan nimin khan New Delhi-ah Asian Development Bank (ADB) hotute a kâwm a, ADB aṭanga ṭanpuina awm theite a sawipui.

Lalnghinglova Hmar hi India rama ADB country director Mio Oka hoin hotute'n an lo dawngsawng a; Mizorama tourism lama hmasawnna thleng mek ṭhantir zel tur leh khualzin tam zawk dawngsawng thei turin state budget ringawtin a tlin loh thu Minister chuan a sawi a, "Externally Aided Project kaltlangin ADB aṭanga loan kan mamawh," a ti.

Mizoram khawpui Aizawl chu khualzin tana zan thum châmna daiha siam chu an thupui pakhat a nih thu sawiin Tourism Minister chuan, "Chutihlaiin, thingtlang lamah eco tourism kalpui a, khawtlang nen ṭang kawpa community based tourism kalpui hi kan thupui a ni," a ti a; wildlife tourism kalpui turin Environment & Forest department nen thawhhona an ziah tawh thu a sawi.

Sports minister Lalnghinglova Hmar chuan, "Infiamna hi intihhlimna satliah ni loin, tunah chuan eizawnna a ni a, India sorkar pawhin a dah pawimawh hle. Ruhrel piah lamah infiammite tihmasawn tura man power development lamah kal nat kan duh a, ADB puihna kan mamawh. Sports tourism hi state tana sum lak luhna ṭha a ni thei," a ti.

ADB hotunu Mio Oka chuan, Mizoram sorkar inhawnna lawmawm a tih thu sawiin, "Tun hma deuha dilna in rawn thehluh kan lo hnâwl tawh chu urban development project neih mekte nen kai kawpa a hranpaa kalpui dan an ngaihtuah a ni ang," a ti a, Finance Ministry-ah bawhzui a tum thu a sawi.

Lalnghinglova Hmar hian Department of Economic Affairs, Finance Ministry-a joint secretary (ADB changtu) Baldeo Purushartha pawh a kâwm a, ADB lama Externally Aided Project kaltlanga loan dilna awm mek a sawipui. Baldeo hian ADB nen a rang lama an sawiho tur thu leh, pek ngei a nih theih nan hmalak a tum thu a sawi a; Mizoramin a hlâwkpui tur zawnga project her rem ṭul a tih thu a sawi bawk.