South Tuipui MLA-in Hnahthialah Patient Attendant Shelter a hawng

South Tuipui bialtu MLA Jeje Lalpekhlua chuan nimin khan a biala Hnahthial District Hospital bulah damdawi-ina damlo awmpuitute awm hahdamna leh riahna tur Patient Attendant Shelter a hawng.

Jeje Lalpekhlua chuan, damlo enkawl tura kalpuitute'n thlenna tur an neih ṭhat loh vanga harsatna an tawh ṭhin chu sutkian a nih dawn thu a sawi a; a lawm thu sawiin, a nihna tur dik taka hmang tur leh mi harsa zawkte duhsak nachang hre turin Shelter enkawltu turte a chah.

Patient Attendant Shelter hi Shelter for Urban Homeless Scheme hnuaiah UDPA department chuan Rs 38,80,440 sêngin an sa a; March 6, 2024-ah sak ṭan niin, May 26, 2025 khan sak zawh a ni. Chhawng hnih niin, bedroom pathum, dormitory pakhat leh thil dangte a awm.