KHAWTHLIR

Jail-ah health camp

Serchhip District Legal Services Authority leh District Hospital chuan nimin khan District Jail, Chhiahtlangah jail tángte leh thawktute hriselna dinhmun endikna, Health Camp an buatsaih. Camp-ah hian specialist doctor pangain jail-a táng mi 71 leh naute pakhat bakah, thawktu mi 10-te hriselna dinhmun an endik a; natna inkai chhâwn theih loh leh, TB vei leh vei loh an enfiah nghal a, a thlâwnin damdawi an sem bawk a ni.

Rally buatsaih

Foundation for Drug-Free, Mizoram chuan an din champha vawi 7-na pualin nimin khan 'Ruihhlo tel lo nun duhawm zawk' tih thupui hmangin Aizawlah kawngzawh (rally) an buatsaih. Foundation for Drug-Free Mizoram hi April 1, 2019 khan din a ni a, kum sarih chhunga an hmalaknaah ruihhlo laka fihlim turin tleirawl leh naupang mi 25,113 an intiam tawh niin an tarlang.

Squad drive ti dawn

Lawngtlai District Road Protection Squad chu Lawngtlai SDO (Sadar) Margaret J Vanlalremmawii kaihhruaiin nimin khan DC conference hall-ah an ṭhukhawm. Lawngtlai khawpui chhung kawng dunga lirthei dah leh kawngpui dâla in sakna bungrua dahte endik an rêl a; chawlhkar tharah hmun hnihah inṭhenin, khawpui chhung veng pangaah squad drive an nei dawn a ni.

Zu kaihhnawihah mi 11,176 man

Excise & Narcotics department chhinchhiah danin, kum 2024 aṭanga kumin January 31 thleng khan Mizoram Excise Act, 1974 hnuaiah mi 702 man niin, thubuai 752 ziah luh a ni a; Mizoram Liquor (Prohibition) Act, 2019 hnuaiah mi 10,474 manin, thubuai 11,561 ziah luh a ni tawh bawk. Kum 2024 aṭanga January 2026 thlenga zu kaihhnawiha man zat hi mi 11,176 an ni a, thubuai 12,313 ziah luh a ni.