Sudden Muanga bu leh a ziaktu bungrua Mizoram State Museum-a dah turin inhlan

March 30, Thawhṭanni tlai khan Lamka Branch YMA, Manipur hruaitute chuan Mizo comics lar tak 'Sudden Muanga' tih ziaktu Lalsangzuala bungraw hlui, Sudden Muanga a ziahna hmanrua leh Sudden Muanga bu hlui eng emaw zat chu Mizoram State Museum, Aizawla dah turin Central YMA hruaitute hnenah an hlan.

Bungraw inhlanna hun kaihruaitu CYMA general secretary Prof. Malsawmliana chuan, Sudden Muanga thawnthu kha a hun laia Mizo comics-ah chuan a lar ber leh a chhuah hlan an nghahhlelh thin, thawnthu awmze nei leh darhzau a nih thu sawiin, "Mizo literature-ah hmun pawimawh tak luahtu a ni," a ti.

CYMA GS chuan Lalsangzuala chhungten Mizo mipui tam zawkin a sulhnu an hmuh theihna tura langsar zawka pho chhuah an remti leh Central YMA kuta an hlan chu lawmawm a tih thu a sawi.

Lamka Branch YMA president F Lalhmingmawia chuan Lalsangzuala sulhnute hi a bo thlau nasa tawh tih sawiin, "Sudden Muanga bu pawh a kim lo nasa tawh a, neih kim leh dan awm se a duhawm khawp mai," a ti a, bungruate hi CYMA GS hnenah a hlan.

Central YMA hian hun remchangah Mizoram State Museumah heng bungruate mipui hmuh theih tura pho chhuah turin an hlan ang.